ಹೈಲೈಟ್ಸ್‌:
- ಸರ್ಕಾರಿ ಇಲಾಖೆ-ಕಿಯೋನಿಕ್ಸ್‌ ನಡುವೆ ಭಾರೀ ಭ್ರಷ್ಟಾಚಾರ!
- ಲಕ್ಷ ರುಪಾಯಿ ಮೌಲ್ಯದ ಸೊತ್ತುಗಳಿಗೆ ಕೋಟ್ಯಂತರ ರೂ. ಬಿಲ್
- ಆಡಿಟ್‌ ವೇಳೆ ಬಯಲಾಯ್ತು ಬ್ರಹ್ಮಾಂಡ ಭ್ರಷ್ಟಾಚಾರದ ಮುಖವಾಡ
- ಸರ್ಕಾರದ ನಾನಾ ಇಲಾಖೆಗಳಿಗೆ ಕಿಯೋನಿಕ್ಸ್‌ ಮೂಲಕ ಸೊತ್ತುಗಳ ಪೂರೈಕೆ
- ನೀರು ಕುಡಿದಂತೆ ಸರ್ಕಾರದ ದುಡ್ಡನ್ನು ಸಲೀಸಾಗಿ ತಿಂದು ತೇಗಿದ್ದಾರೆ ಭ್ರಷ್ಟರು!
ಕಿಯೋನಿಕ್ಸ್‌ ಮೂಲಕ ಸರ್ಕಾರದ ವಿವಿಧ ಇಲಾಖೆಗಳಿಗೆ ಪೂರೈಕೆಯಾಗಿರುವ ವಾಷಿಂಗ್‌ಮೆಷಿನ್‌, ನೀರು ಶುದ್ಧೀಕರಣ ಘಟಕ ಹಾಗೂ ಕಂಪ್ಯೂಟರ್‌ಗಳಿಗೆ ಮಾರುಕಟ್ಟೆ ದರಕ್ಕಿಂತ ಎರಡ್ಮೂರು ಪಟ್ಟು ಹೆಚ್ಚು ಬಿಲ್ ಮಾಡಿಕೊಂಡಿರುವ ಸಂಗತಿ ತಡವಾಗಿ ಬೆಳಕಿಗೆ ಬಂದಿದೆ. ಆ ಮೂಲಕ ಸರಕಾರಿ ಇಲಾಖೆಗಳು ಹಾಗೂ ಕಿಯೋನಿಕ್ಸ್‌ ನಡುವೆ ನಡೆದಿರುವ ಭಾರೀ ಮಟ್ಟದ ಭ್ರಷ್ಟಾಚಾರ, ವಂಚನೆಗಳು ಬಗೆದಷ್ಟು ಹೊರ ಬರುತ್ತಿವೆ. ಲಕ್ಷ ರೂಪಾಯಿ ಬೆಲೆ ಬಾಳುವ ಸೊತ್ತುಗಳಿಗೆ ಕೋಟ್ಯಂತರ ರೂಪಾಯಿ ಬಿಲ್ ಮಾಡಿ ನೀರು ಕುಡಿದಷ್ಟೇ ಸಲೀಸಾಗಿ ಸರ್ಕಾರದ ದುಡ್ಡನ್ನು ತಿಂದು ತೇಗಿದ್ದಾರೆ ಭ್ರಷ್ಟರು!
ಚಾಮರಾಜನಗರ: ಸರಕಾರದ ನಾನಾ ಇಲಾಖೆಗಳಿಗೆ ಕಿಯೋನಿಕ್ಸ್‌ ಮೂಲಕ ಪೂರೈಕೆಯಾಗಿರುವ ವಾಷಿಂಗ್‌ಮೆಷಿನ್‌, ನೀರು ಶುದ್ಧೀಕರಣ ಘಟಕ ಹಾಗೂ ಕಂಪ್ಯೂಟರ್‌ಗಳಿಗೆ ಮಾರುಕಟ್ಟೆ ದರಕ್ಕಿಂತ ಎರಡ್ಮೂರು ಪಟ್ಟು ಹೆಚ್ಚು ಬಿಲ್ ಮಾಡಿಕೊಂಡಿರುವ ಸಂಗತಿ ತಡವಾಗಿ ಬೆಳಕಿಗೆ ಬಂದಿದೆ. ಆ ಮೂಲಕ ಸರಕಾರಿ ಇಲಾಖೆಗಳು ಹಾಗೂ ಕಿಯೋನಿಕ್ಸ್‌ ನಡುವೆ ನಡೆದಿರುವ ಭ್ರಷ್ಟಾಚಾರ, ವಂಚನೆಗಳು ಬಗೆದಷ್ಟು ಹೊರ ಬರುತ್ತಿವೆ.
ಈ ವಸ್ತುಗಳ ಪೂರೈಕೆ ಮೂಲಕ ಹೆಚ್ಚುವರಿಯಾಗಿ ಕೋಟ್ಯಂತರ ರೂ. ಬಿಲ್ ಆಗಿರುವುದು ಮಹಾಲೇಖ ಪಾಲರ ತಪಾಸಣೆ ವೇಳೆ ಪತ್ತೆಯಾಗಿದೆ. 2019-20ನೇ ಸಾಲಿನಲ್ಲಿ ಅಲ್ಪಸಂಖ್ಯಾತರ ಕಲ್ಯಾಣ ಇಲಾಖೆಯು ತನ್ನ ಮೊರಾರ್ಜಿ ದೇಸಾಯಿ ಹಾಸ್ಟೆಲ್‌ಗಳಿಗೆ 15 ಕೆಜಿ ಸಾಮರ್ಥ್ಯದ ವಾಷಿಂಗ್‌ ಮೆಷಿನ್‌ ಪೂರೈಕೆಗಾಗಿ ಕಿಯೋನಿಕ್ಸ್‌ಗೆ ಬೇಡಿಕೆ ಸಲ್ಲಿಸುತ್ತದೆ. ಒಟ್ಟು 270 ವಾಷಿಂಗ್‌ ಮೆಷಿನ್‌ಗಳ ಪೂರೈಕೆಗೆ ಒಪ್ಪಂದವೂ ಆಗುತ್ತದೆ. ಅದು ಸ್ಟಾರ್‌ ಫಿಶ್‌ ಕಂಪನಿಯ ವಾಷಿಂಗ್‌ ಮೆಷಿನ್‌ಗಳನ್ನು ಪೂರೈಸಿರುವ ಬಗ್ಗೆ ದಾಖಲೆಗಳು ಹೇಳುತ್ತವೆಯಾದರೂ ವಾಸ್ತವವಾಗಿ ಪರಿಶೀಲನೆ ವೇಳೆ ಎಲ್‌ಜಿ ಮತ್ತು ಬೇರೆ ಬೇರೆ ಕಂಪನಿಯ ಹಾಗೂ ಕಡಿಮೆ ಸಾಮರ್ಥ್ಯದ ಮೆಷಿನ್‌ಗಳನ್ನು ಪೂರೈಸಲಾಗಿರುವುದು ಪತ್ತೆಯಾಗಿದೆ. ಒಂದು ವೇಳೆ ಸ್ಟಾರ್‌ಫಿಶ್‌ ವಾಷಿಂಗ್‌ ಮೆಷಿನ್‌ ಅನ್ನೇ ಎಲ್ಲ 270 ಕಡೆಗಳಿಗೂ ಪೂರೈಸಿದ್ದರೂ ಅದರ ಮಾರುಕಟ್ಟೆ ದರ 3.18 ಲಕ್ಷ. ಆದರೆ, ಕಿಯೋನಿಕ್ಸ್‌ ಪೂರೈಕೆ ಮಾಡಿ, ವಿಧಿಸಿರುವ ದರ 5.54 ಲಕ್ಷ ರೂ., ಅಂದರೆ ಒಂದೇ ವಾಷಿಂಗ್‌ ಮೆಷಿನ್‌ನ ದರದ ವ್ಯತ್ಯಾಸ 1.55 ಲಕ್ಷ ರೂ. ವಾಸ್ತವವಾಗಿ 66 ಸ್ಟಾರ್‌ಫಿಶ್‌ ಹಾಗೂ 179 ಎಲ್‌ಜಿ ಕಂಪನಿಯ ವಾಷಿಂಗ್‌ ಮೆಷಿನ್‌ಗಳನ್ನು ಪೂರೈಸಲಾಗಿದೆ ಎಂಬುದಾಗಿದೆ.
ಎಲ್‌ಜಿ ಕಂಪನಿ ವಾಷಿಂಗ್‌ ಮೆಷಿನ್‌ ಮಾರುಕಟ್ಟೆ ದರ ಕೇವಲ 99 ಸಾವಿರ ರೂ. ಇದ್ದು, ಇಲ್ಲಿ ಅದಕ್ಕೂ 5.54 ಲಕ್ಷ ರೂ. ಬಿಲ್ ಮಾಡಲಾಗಿದೆ. ಹೀಗಾಗಿ ಮಾರುಕಟ್ಟೆ ದರಕ್ಕಿಂತ ಒಟ್ಟು 9.28 ಕೋಟಿ ರೂ. ಬಿಲ್ ಮಾಡಿಕೊಳ್ಳಲಾಗಿದೆ ! ಇನ್ನು ಇದೇ ರೀತಿಯಲ್ಲಿ ಕೃಷಿ ಇಲಾಖೆಗೆ ಒಟ್ಟು 472 ಕಂಪ್ಯೂಟರ್‌ (ಡೆಸ್ಕ್‌ಟಾಪ್‌)ಗಳ ಪೂರೈಕೆಗಾಗಿ ಒಪ್ಪಂದವಾಗಿ, 45 ಸಾವಿರ ರೂ. ಮಾರುಕಟ್ಟೆ ದರದ ಕಂಪ್ಯೂಟರ್‌ಗಳಿಗೆ 80 ಸಾವಿರ ರೂ. ಬಿಲ್ ಮಾಡಲಾಗಿದೆ. ಇದರ ಒಟ್ಟಾರೆ ವ್ಯತ್ಯಾಸದ ಹಣ 1.68 ಕೋಟಿ ರೂ. ಎಂಬುದು ಅಚ್ಚರಿ ಜತೆಗೆ ನೀರು ಕುಡಿದಷ್ಟೇ ಸಲೀಸಾಗಿ ಮಾಡಿರುವ ಭ್ರಷ್ಟಾಚಾರದ ಬಗ್ಗೆ ದಿಗಿಲು ಮೂಡಿಸುತ್ತದೆ. ಇದಲ್ಲದೇ ಮಸೀದಿ, ಜೈನ ಬಸದಿ, ದರ್ಗಾಗಳಿಗಾಗಿ ಅಲ್ಪಸಂಖ್ಯಾತರ ಕಲ್ಯಾಣ ಇಲಾಖೆಯು 100 ಲೀಟರ್‌ನ ನೀರು ಶುದ್ಧೀಕರಣ ಘಟಕಗಳ ಪೂರೈಕೆಗೆ ಅದೇ ಕಿಯೋನಿಕ್ಸ್‌ಗೆ ಬೇಡಿಕೆ ಇಟ್ಟಿದ್ದು, ಮಾರುಕಟ್ಟೆ ದರ 60 ಸಾವಿರ ರೂ. ಇರುವ ಘಟಕಗಳಿಗೆ 1.5 ಲಕ್ಷ ರೂ. ಬಿಲ್ ಮಾಡಲಾಗಿದೆ.
ಅದರಂತೆ ಒಟ್ಟು 3,225 ನೀರು ಶುದ್ಧೀಕರಣ ಘಟಕಗಳಿಗೆ ಆದ ಹೆಚ್ಚುವರಿ ಬಿಲ್ 29.2 ಕೋಟಿ ರೂ. ಇದರೊಂದಿಗೆ ರಾಜ್ಯ ತಾಂಡಾ ಅಭಿವೃದ್ಧಿ ಕಾರ್ಪೋರೇಷನ್‌ ಮನವಿ ಮೇರೆಗೆ ನಾನಾ ಕಡೆಗಳಿಗೆ ಒಟ್ಟು 375 ದೊಡ್ಡ ಮಟ್ಟದ ನೀರು ಶುದ್ಧೀಕರಣ ಘಟಕಗಳನ್ನು ಪೂರೈಸಿದ್ದು, ಇವುಗಳ ಮಾರುಕಟ್ಟೆ ದರ ತಲಾ 2.40 ಲಕ್ಷ ರೂ. ಇದ್ದರೆ ಬಿಲ್ ಆಗಿರುವುದು 11 ಲಕ್ಷ ರೂ.ಗೆ. ಹೀಗಾಗಿ ಒಟ್ಟಾರೆ ತಲಾ ಒಂದರ ವ್ಯತ್ಯಾಸದ ದರ 8.6 ಲಕ್ಷ ರೂ. ಇದ್ದು, ಒಟ್ಟಾರೆ ಹೆಚ್ಚುವರಿಯಾಗಿ 32.2 ಕೋಟಿ ರೂ. ಬಿಲ್ ಮಾಡಿಕೊಂಡಿರುವುದನ್ನು ಆಡಿಟ್‌ ವೇಳೆ ಬಯಲಿಗೆ ಎಳೆಯಲಾಗಿದೆ.